Apoiando a Leticia Aguín: CACEROLADA 7 XULLO, e instancia ao concello

Seguimos apoiando a Leticia Aguín!!!

O sábado, 25 de xuño estivemos na charla coloquio da PAH Pontevedra, que se celebrou en Portonovo, e nela puidemos informarnos dos pasos que están levando a cabo desde a PAH.

O venres, 1 de xullo, presentamos, por rexistro, no concello un escrito instando ao órgano de Goberno Municipal de Sanxenxo a que con carácter de urxencia presente e aprobe unha moción para que o pleno se sitúe a favor das familias afectadas e que inste o Goberno Español a eliminar de forma inmediata e definitiva o IRPH Entidades e que os intereses abusivos cobrados polas entidades como efecto da aplicación de calquera das variedades de IRPH sexan devoltos aos consumidores; así como que este consistorio poña a disposición das familias afectadas un servizo para asesorar , axudar e supervisar a todas as persoas afectadas que queiran revisar esta cláusula, ante o risco de seguir aplicando tipos desproporcionados e abusivos desde as entidades bancarias, tal como denunciou varias veces a Comisión Europea .

Este próximo xoves, 7 de xullo, a PAH Pontevedra organiza unha gran Cacerolada para ás 11.00h. da mañá diante da sucursal ABANCA de Portonovo, na que estaremos dando o noso apoio.

Gustaríanos, como asociación municipal, facer un chamamento a todas as persoas, colectivos e órganos institucionais a que se acheguen, pregunten, coñezan todo o proceso polo que está a pasar esta veciña de Sanxenxo, afincada en Dena, e mostren o seu apoio coa súa presenza na CACEROLADA; pois bótase de menos a presenza e a pouca ou nula preocupación dos distintos membros de goberno (sobre todo aqueles e aquelas que teñen competencia como poden ser os concelleiros/as de Asuntos Sociais) tanto do concello de Sanxenxo como o de Meaño.

Un saúdo,